من كام يوم …

صليت العصر، وقاعد شوية في الجامع بعد الصلاة، لقيت واحد جارنا لسة نازل من بيته عشان يصلي 

ففكرت تفكير عادي … ياترى الراجل ده كان قاعد بيعمل ايه في البيت؟

فقلت: يا إما بيتفرج على التليفزيون، يا إما بيتكلم مع زوجته، يا إما نايم من الفراغ.

قلت: يعني هو ما عندوش شغل؟

وبعدين افتكرت إنه عنده محل، والمحل شغال ماشاء الله وهو بس بيحتاج يشرف كل فترة من غير ما يتدخل أوي

وده مش بيحتاج منه وقت كبير

وبعدين فكرت في حال الناس عموما في موضوع الشغل

بعض الناس عيشتها كالآتي

يصحى الصبح يصلي ويفطر

وينزل الشغل

ويرجع من الشغل

يقعد يتغدى     

ويقعد مع أهله شوية

وبعدين يدخل ينام

وبعدين يصحى الصبح يصلي ويفطر

وينزل الشغل

وهكذا………… إلخ

سبحان الله

ايه العيشة دي؟

هو المفروض الإنسان ييجي الدنيا يدور في طاحونة الدراسة وبعدين الشغل وبعدين العيال وبعدين……. وبعدين ايه؟

وبعدين يموت!!

يقابل ربنا ازاي؟

يقابل ربنا بإيه؟

ايه لزمة الحياة بالطريقة دي؟

قلت: سبحان الله … الناس حولت الوسائل إلى مقاصد

يعني ربنا أصلا خلقنا عشان نعبده، وفي نفس الوقت جعل لنا وسائل نعيش بيها منها الدراسة ومنها الشغل ومنها الزواج ومنها الأولاد

لكن تلاقي الناس دلوقتي خلت كل همها الدراسة والشغل

كأن ربنا خلقنا عشان ندرس ونشتغل!!

ايه فايدة الحياة دي من غير هدف أخروي كبير؟

فيه ناس عرفت هدفها الأخروي

فتلاقي الداعية وتلاقي العالم وتلاقي اللي بيتبرع بفلوس لجهات خيرية وتلاقي اللي العبادة مالية عليه حياته وتلاقي المشغول بحل مشاكل الناس وتلاقي وتلاقي …

لكن أنا وانت عملنا ايه؟

ياترى هنقابل ربنا ازاي؟

هنقول له ايه؟

ياترى احنا لينا لازمة في الحياة دي ولا عايشين زيادة على الدنيا؟

ساعات لما بفكر في إحدى الآيات ببقى هتجنن

وهي آية

(ثُمَّ لَتُسْأَلُنَّ يَوْمَئِذٍ عَنِ النَّعِيمِ)

يا الله

هنتسأل عن كل النعيم ده؟

بيت مستقر

عيشة مناسبة

مستوى اجتماعي كويس

كمبيوتر وانترنت

سرير مريح وبطانية بتتغطى بيها وانت نايم

ما قعدش جعان كذا يوم ورا بعض

ثقافة وعقل متفتح

لو قعدت أعد مش هخلص

كل ده هتسأل عنه عملت بيه ايه؟

وازاي استخدمته في طاعة ربنا؟

يا الله

هنقول لربنا ايه؟

يا رب رحمتك

وفي الآخر

يا ترى ايه الهدف الأخروي المحدد اللي أنا عايش عشانه؟

وهل فعلا بسعى في تحقيقه؟    

دي كانت مجرد خواطر

معلش طولت شوية

ربنا ينفعنا بيها ويعفو عنا ويغفر لنا تقصيرنا

والسلام عليكم ورحمة الله وبركاته