ياريت والله بس مش قادر – الجزء الأول

أ: يا سلااااااام، الواحد نفسه كدة يحفظ القرآن
ب: طب ما تحفظ واقف ليه؟
أ: مش عارف

أ: يا سلااااام نفسي أبقى متفوق كدة في دراستي.
ب: طب وانت ليه مش متفوق؟
أ: مش قادر

أ: يا سلااااااااام، لو الواحد يحسن علاقاته مع الناس.
ب: طب ما تحسن يابني!
أ: مش عارف مالي، نفسي في حاجات كتير بس مش قادر أعملها
حاولت كتير وما فيش فايدة
يمكن أكون محسود؟
يمكن أنا حظي كدة؟
مش عارف
أنا تعبت في نفسي والله

المواقف دي وأشباهها كتير بتحصل معانا كلنا
أكيد كل واحد فينا نفسه يعمل حاجات كتير وما عرفش
جرب ووقع وقام ومفيش فايدة
حاول وثابر وبرضه مش نافع
ياترى ايه السبب؟
ايه السر؟
ليه المواقف دي بتتكرر معانا كتير؟

لاااااا
ده موضوع كبير أوي
إن شاء الله في السلسلة دي هنتعلم مع بعض حاجات رائعة تمكن الواحد بإذن الله إنه يعمل الحاجات اللي نفسه يعملها ومش قادر
وكلها تطبيقات عملية زي ما اتفقنا في التعريف بالمدونة
وطبعا الحاجات دي جربتها بنفسي
صحيح أنا ما اخترعتهاش
لكن جربتها بنفسي ونجحت نجاح ساحق والحمد لله رب العالمين
فجيت هنا أنقل لكم التجارب دي ولكن مع بعض المقدمات الهامة اللي هتعرفنا أساس وأهمية التطبيقات دي

ناخد الموضوع من أوله

أي واحد في الدنيا عايز يعمل أي حاجة عشان يوصل لنتيجة لازم بيمر بمراحل

أنتونتي روبينز في كتاب ليه اسمه (قدرات غير محدودة) رسم رسمة جميلة أوي بتوضح الموضوع ده
رسم رسمه زي دي كدة

اعتقادات ===> قدرات ===> أفعال ===> نتائج ===> اعتقاد……وهكذا

الرسمة دي بتقول إنك عشان توصل لنتيجة لازم تمر بالمراحل دي
1- اعتقادات تجاه الفعل ده
يعني أي حاجة انت كنت عايز تعملها أكيد عندك اعتقاد متعلق بيها
يعني مثلا معتقد إنك تقدر تعمل الحاجة دي أو ما تقدرش
أو معتقد إن الحاجة دي مهمة أو مش مهمة
أو معتقد إن الحاجة دي صعبة أو سهلة
وهكذا

الاعتقاد بينقلك للمرحلة التانية
2- قدرات
القدرات اللي عندك بتتولد حسب اعتقادك المتعلق بالفعل
أكيد فيه فرق في القدرات بين واحد شايف المادة دي سهلة وبين واحد تاني شايفها صعبة
أكيد فيه فرق في القدرات بين واحد معتقد إنه يقدر يجيب امتياز وبين واحد تاني شايف إن مقبول كفاية عليه أوي

يبقى القدرة دي تولدت منين؟
تولدت من الاعتقاد

طيب القدرة تنقلنا للمرحلة التالتة
3- الفعل
حسب قدرات هتتحرك
حسب قدرات هتنجز

بعد كدة الفعل ينقلنا للمرحلة الرابعة
4 النتيجة
حسب مذاكرتك وحلك في الامتحان تكون النتيجة
حسب اجتهادك وشغلك في العمل تكون المكافآت
وهكذا…..

وبعد كدة النتيجة تروح على الاعتقاد وتزوده وهكذا لغاية ما الإنسان يتعود على الحاجة دي وتبقى جزء من شخصيته

ناخد مثال على الكلام ده

أنا مثلا في سنة تانية ميكانيكا
السنة الحقيقة كانت مرهقة للغاية

ما كنش فيه وقت إنك تقعد تذاكر إلا وقت بسيط جدا وفي الأغلب الوقت ده بيتملي بحاجات تانية بيطلبوها الدكاترة
فالإرهاق ده ولد عندي اعتقاد إني كفاية عليا أوي مقبول السنة دي

بالتالي الاعتقاد ده ولد عندي قدرات ضعيفة سواء في المذاكرة أو حل الامتحان
وكانت النتيجة إني سقطت في السنة دي والحمد لله طبعا على كل حال

صحيح أنا شايف ومتأكد إني كنت بذاكر كويس وإن كان فيه ناس بتذاكر زيي أو أقل مني ونجحت وجابت تقدير
طيب أنا هصدق نفسي
لكن يا ترى ايه الفرق بيني وبين واحد بيذاكر زيي أو أقل مني ونجح أو جاب تقدير؟
أظن الفرق بيكون في حل الامتحان

فرق كبير بين واحد داخل الامتحان عشان يجيب مقبول (زيي أنا كدة) وبين واحد تاني شايف إنه يقدر يجيب تقدير (زي الناس اللي نجحت(
صحيح الدفعة بتاعتي كان سقط معايا 24% من الدفعة (الرقم اللي قرأته صحيح على فكرة) ده غير 33% نجح بمادة أو مادتين (ده رقم صحيح برضه(

لكن برضه أكيد فيه فرق بين الناس اللي نجحت والناس اللي ما نجحتش
فزي ما قولت فرقت في حل الامتحان إن ما كانتش فرقت في المذاكرة

يبقى نشوف الموضوع من الأول
1- أنا داخل السنة أو الامتحان باعتقاد إني ما اقدرش أجيب إلا مقبول أو إن مقبول كفاية عليا
2- فده ولد قدرات تتناسب مع الاعتقاد فبالتالي كانت قدرات ضعيفة
3- القدرات دي ولدت أفعال تتناسب معاها فكانت الأفعال ضعيفة سواء كانت المذاكرة قليلة أو إن الحل في الامتحان كان ضعيف
4- النتيجة إن سقطت والحمد لله

قصة مأساوية صح؟
طب وبعدين؟

لا كدة أنا طولت أوي كفاية أوي النهاردة نكمل المرة الجاية إن شاء الله بس بعد ما أشوف تعلقاتكم منورة الموضوع

والسلام عليكم ورحمة الله وبركاته

ملحوظة مهمة: في كلامي في أول الموضوع أنا ما أنكرتش الحسد ولا حاجة
ولكن أنا بتكلم عن الناس اللي بتبرر فشلها بالحسد وخلاص