هذه المدونة

السلام عليكم ورحمة الله وبركاته

الإخوة الأفاضل والضيوف الأكارم
ربنا سبحانه وتعالى يعلم إني كنت من أشد المعارضين لموضوع المدونات ده لأسباب وروابط سلبية كتير
ولكن سبحان مغير الأحوال أديني دلوقتي عندي مدونة وبكتب فيها أول تدوينة ليا

المهم
اللي أنا شوفته من كتير من المدونين للأسف إنهم بيعملوا مدونات وبعد كدة يقعد يفكر: هكتب فيها ايه… هكتب فيها ايه….. وفي الآخر تلاقي المدونة تشكيلة من مواضيع كتير وتباريح وتفاريح وكل حاجة
لكن المدونة دي الحقيقة أنا عملتها لحاجتي ليها
اللي حصل إني لقيت عندي والحمد لله حصيلة لا بأس بها في مجال التنمية البشرية وجربت قبل كدة وكتبت مواضيع من تأليفي في المجال ده في بعض المنتديات الشبابية وبفضل الله لاقت قبول كبير عند أعضاء المنتديات دي
ففكرت إني أعمل مدونة بحيث يكون ليا كيان خاص أنشر فيه مقالاتي وأفكاري في المجال ده وفي نفس الوقت أتمتع بالحرية

الأول أعرفكم بنفسي
أنا أخوكم مصطفي حسان
طالب بكلية الهندسة قسم ميكانيكا
مواليد سنة 86 وليا بعض الاهتمامات الأخرى أهمها إنشاء مواقع بنظام (جملة!) وهو أحد أكبر أنظمة إدارة المحتوى

إن شاء زي ما قولت في المدونة هبدأ أنشر مقالاتي في مجال التنمية البشرية وكذلك هيكون فيه حاجات كتير مفيدة إن شاء الله في مجالات أخرى وإن شاء الله تلاقوا مفاجآت تسعدكم وتفيدكم

طيب المدونة دي متميز بإيه؟
معظم الكلام اللي موجود دلوقتي في التنمية البشرية مجرد كلام نظري
وعن تجربة
الكلام النظري = كلام نظري برضه
ومفيش حد داق حلاوة التنمية البشرية إلا وكان طبقها عملي

أنا عن نفسي كنت هكره التنمية البشرية باللي فيها بسبب موضوع النظري ده
كنت أسمع كلام كتير ولكني مش عارف أجدد حاجة في حياتي
ولكن ربنا سبحانه وتعالى رزقني العملي بعد كدة مع كتاب كيف تخطط لحياتك للدكتور صلاح الراشد ساعتها حسيت بحلاوة التنمية البشرية وأهميتها

فإن شاء الله المدونة هتكون مميزة بأنها مش هتكون مجرد كلام نظري
إن شاء الله في كل موضوع هناخد تطبيقات على الكلام بحيث نحقق أكبر استفادة

ملحوظة مهمة: المدونة دي مش معمولة لمناقشة الحكم الشرعي في التنمية البشرية والبرمجة اللغوية العصبية
فأي حد عايز يناقش الكلام ده فبقول له ده مش المكان المناسب ليك وفيه أماكن تانية تقدر تناقش فيها الكلام ده
المدونة دي لإفادة الناس فقط وليس للمناقشات والمجادلات
وأتمنى الالتزام مننا كلنا بالنقطة الخطيرة دي

وفي ختام التقدمة أسأل الله سبحانه وتعالى أن يبارك في هذه المدونة وأن يجعلها حجة لي لا عليّ وأن يجعلها فائدة تعم على كل من اطلع عليها
وصل اللهم على نبينا محمد وعلى آله وصحبه والتابعين
والسلام عليكم ورحمة الله وبركاته